Viatjar durablament, mestrejar la vitessa, a hum desaunèis meilèu que de calhaus, profieitar deu paisatge, encontrar l’aute, lo vesin, har espelir alternat ivas artisticas per las creacions nostas, trobadors de uei lo dia au servici e au despéner de la princessa Occitania.
A comptar deu mes de seteme 2014 e dinc en noveme, Lucia Albert et Didièr Tosis temptan lo jòc d’un torn d’Occitania a bicicleta
. Un viatge de dus o tres mes, dab estapas de 20, 30 o 40 km, au ritme tranquillòt de l’escota e deu partatge. Partença e arribada Soston, Lanas, occitania occidentala.
La mira qu’es de perpausar en escambi deu dequé minjar e dromir, un espectacle bilingue a vòsta, dab duas votz, a l’entorn de la poesia, deu cant, deu conde, ua dralha entà condar l’istoèra intima, las sofrenças, las jòias e los secrets d’un país, atau com harem d’ua istoèra d’amor.
L’espectacle qu’es donc a gratis, a cada arcuelhant de convidar los amics, la familha, ua comunautat o ua associacion, ua collectivitat. Pas nada condicion tecnica, lhevat un chic de silenci e la hami de’s har pataquejar un chic lo còr. L’espectacle acostica que’s pòt debanar a casa, au cornèr deu huec, dens lo garatge, la sala d’amassada o d’espectacle, l’escòla, o devath los grans arbos deu casau per las bèras vrespadas d’abòr Lucia qu’es encargada de difusion deu collectiud’artistes landés, Pit Produccion, e cantaira dab lo grop polifonic de gojatas bearnesas Dauna Jupeta.
Didièr qu’es autor, cantaire e poeta occitan e francés notadament dab lo son espectacle de cançons « La lenga aus p ò t s « . Que sòrt de publicar un recuelh de poèmas, « Pregàrias », en çò de Reclams.
Lo camin que’s basteisherà au briu de las convidas, de las perpausicions e de las ideas. Un tròç de camin amassa, un escabòt de pedalaires occitans ? Trantalhatz pas donc a préner contacte !
contact@pitprod.com www.pitprod.com 06 34 65 77 44
