Édito n°233
Estossi l’esquèrra…
Pertocant ua descobèrta anatomica recenta : lo melic qu’ei a l’esquèrra…pas lo còr
Estossi l’esquèrra, que prenerí la pagèra de l’espectacle que soi a dar.
—Que’m demandarí s’ei vertadèrament rasonable de deishar créder qu’existeish la hemna o l’òmi providenciau.
—Que’m demandarí se la question ei vertadèrament que’s presenti l’un o l’auta a l’eleccion presidenciau
—Que’m demandarí se la democracia ei un jòc de monacas russas, çò qui vòu díser ua seguida d’eleccions, de primàrias de primàrias, entà n’arribar a ua primària e enfin a la designacion d’ua candidata o d’un candidat.
—Que’m demandarí se la democracia ei de n’arribar a la designacion d’un candidat o d’ua candidat per ua eleccion qui n’ei pas arren mei que de con.hortar un poder personau desmesurat.
—Que demandarí çò qu’ei l’esquèrra
—Que’m demandarí çò qu’ei un programa d’esquèrra
—Que m’interrogarí a prepaus de totas las errors hèitas peus govèrns e capdaus d’esquèrra desempuish annadas e qui an aviat quauques electors d’esquèrra a’s trobar uei a l’extrèma dreta.
—Que deisharí de voler parlar com l’extrèma dreta entà esperar arrasterar mei
—Que’m pausarí questions sus l’eleccion d’un president qui n’a pas mei nat contrapoder entà s’acarar a eth
—Que m’avisarí que quitament aus Estats-Units lo president n’a pas tantes poders com a noste
—Que m’interrogarí a prepaus deu culte de la personalitat qui pauc a pauc e’s càmbia en la nòrma
—Que’m demandarí s’ei plan sanitós en democracia que lo nom deu president e lo son prenom sian citats a longor de jornaus, radio, tele e premsa escriuta. Comptatz, que vederatz.
—Que’m demandarí s’ei plan utile en democracia qu’un president de la Republica agi ua opinion sus tot e que l’exprimi.
—Que’m demandarí se d’escríver au president de la Republica cada còp qu’òm a quauques doléncias ei un reflèxe vertadèrament republican.
—Que m’interrogarí sus la democracia.
—Que’m demandarí si ei aqueth pretendut ligam personau enter un òmi o ua hemna d’un costat e un pòble de l’aute, o se non seré pas meilèu un parlament dab poders dab, en mei, de vertadèrs poders descentralizats qui serén autant de contrapoders ?
—Que m’interrogarí a prepaus d’aquera patetica batalha de melics qui’s jòga adara.
—Que’m pausarí la question de saber quantes de nosautes an lo melic a l’esquèrra.
—Que’m pausarí questions sus la descentralizacion e la possibilitat de har que tot non sia decidit de París estant, au demiei deus quauques milierats de personas qui creden d’estar l’eleit de la politica e deus mèdias.
—Que’m demandarí se viu plan la democracia suus platèus de tres o quate canaus de television e de radio, on s’i veden tostemps los medishs a pausar las medishas questions aus medishs candidats, candidatas, o candidats e candidatas potenciaus.
—Que’m demandarí se la democracia parlamentària non seré pas ua bona solucion, tot compte hèit.
—Que’m demandarí quin hèn los qui n’an pas un president omnipotent entà har víver la democracia.
—Que’m demandarí perqué parli tan pauc d’Euròpa.
—Que me’n saberé mau d’aver creat lo president sortent.
Estossi l’esquèrra, que credi que causirí de har campanha per ua sheisau Republica e ua navèra constitucion.
Estossi l’esquèrra que harí aquò en tot estar coerent.
Estossi l’esquèrra, n’anarí pas a ua eleccion qui vos ensenha sonque a díser JO e jamei NOS.
Estossi l’esquèrra, qu’averí en cap lo sovier de 1969 e de l’eleccion presidenciau quan l’esquèrra estó…çò qui poderé estar au mes de mai qui vien.
Estossi l’esquèrra e estossi coerent qu’arrefusarí aquera deriva institucionau e non democratica e NON PRESENTARÍ PAS NAT CANDIDAT A AQUESTA ELECCION.
Estossi l’esquèrra que harí d’aqueth arrefús un acte politic, un programa.
Mes non soi pas L’ESQUÈRRA que’n soi sonque un element e que m’obliga a m’interrogar sus çò qu’ei l’esquèrra e que m’obliga a essajar de har quauques frasas coerentas.
David Grosclaude
