La crisi economica que gançalha lo monde liberau, « sistemica » coma se ditz ara, a d’efièchs despariers. A vista de nas, la scèna politica exagonala d’encuei es un teatre dei manòbras tuergas d’una drecha au sòu que cèrca son camin de Sant Jaume. Es tanben lo luec dei rescòntres improbables d’un electorat populari, dei classas mejanas e d’una senèstra elegida, fa siès mes, dins l’espèra d’una politica diferenta de la drecha. Degun pòu dire çò que se passarà deman, mai l’espectacle de la politica dau jorn a la jornada es dau jamai vist dempuei de temps ! Qu’es pas lo triple A reduch a dos qu’es en causa, lo charavari es enluec…entre dos ego passats de l’escarniment a l’escande de pelhaires. Per la drecha orfanèla, la guèrra dei pichonei caps es au paroxisme : resultats de la votacion refusats, sonada a referendom, creacion d’un grop filhonista independent au parlament e ultimatom de Sarkozy de quitar lo chaplàs. La totala, qué !

A senèstra, es pas mieus : la politica d’austeritat dau governament a monstrat fòrça compreneson per d’unei « colombs » e lo grand patronat. Sa politica repressiva (Auròra Martin,  Ròms, immigracion…) s’es calcada sus aquela de la drecha. Lei grandei trabalhs son pas arrestats (iter, EPR-nuclear, LGV…) maugrat lo deute. Pasmens, non pòt ignorar aqueste poder lei ciutats de la paurilha, leis usinas barradas, lo monde que tomban en dolilha. L’apogèu es dins la repression dau monde paisan en pais nantés. Lei « fòrças de l’òrdre » se liuran a de violéncias incrediblas en temps de patz còntra de manifestants pacifics en majoritat. Se lei paisans rebecan, es en causa de la consciéncia dau darrier combat (per 1% dei  paisans que fan lei badalhs !) contra sa disparicion.  Leiçon durassa que lei salons elisèus an de ressons ensordits dins lo Centre-Capitala.

Aquestei dos partits de la politica d’Amont s’acaptan la realitat sociala e leis enjuecs de deman per la planèta. Pasmens de solucions son possiblas per crear d’emplecs e respondre ais enjuecs climatics coma a la conversion socio-energetica. Semblan ignorar que leis aventuras fòrça mai dangeirosas son totjorn la resulta dei politicas de poder per eu. Tot aquò se fa a bèl esprèssi sens se rendre compte que lo FN es a l’agachon. Tot aquò sente coma un peis poirit. Siam dins lo doble zéro de la politica.

Gerard TAUTIL

Pour réagir : info[a]adeo-oc.eu