Nòstra letra occitanista es arribada a la crosiera : pensar son  alargament e son refortiment coma tota publicacion que tòrna soscar a son desvolopament. Lo CEBIER dempuei abrieu de 1990 a gratat camin amé sei mejans pichòts per informar son lectorat e durbir lo talh d’ una informacion provençala critica e partejada. Sensa pretencion, ambé la participacion de collaborators bontós e un malhum minimòm de legeires actius.  Avèm fach nòstre travalh bi-mestriau amé nòstra consciéncia de sòcis que sabon pro que tot se ganha ò se perd dins la durada. E la durada se confond de còps que i a amé lo travalh a vista e a portada… Constat clarvesent que devèm faire.

Lo bilanç, l’avèm fach : contunhar ambé nòstrei cinq cents abonats e correspondents cada dos mes, tornar mandar una soscripcion cada dos ans (la darriera es tras que positiva), demandar de contribucions escrichas e d’informacions micro-regionalas que son pas totjorn en retorn çò qu’esperaviam ò tornar pausar la question de la premsa militanta occitanista d’ara amé son impacte locau-regionau e son biais de contactes pròpris ?

La causida l’avèm facha dins lo sens d’un alargament ambé la revista OCCITANIA-Volèm Viure al/au País qu’es lo periodic dau Partit Occitan. Non sensa remembrar nòstra revista deis annadas uèchanta, Occitània Encuei, qu’aviá seguit la mema dralha  de fusion ambé Volèm Viure Al País, l’organ dau moviment d’aquesta temporada, per despareisser au còp. Camin estrech de nòstra premsa benevòla a la tauvera…

Per faire lo ponch de nòstreis escambis ambé lei responsables d’OCCITANIA, vos asseguram que la causida non siguèt aisada. N’es estat discutit un protocòl d’acòrdi avans l’estiu :

  – Lo CEBIER  contunia sus siès a uech paginas dins la revista, amé la collaboracion de la còla actuala que desira s’alargar amé vautrei. Serà anonciat dins lo numerò de Genier de 2014.

  – Leis abonaments corrents son seguits per OCCITANIA fins qu’a l’agotament.  

  – Una formula Internet serà mesa a l’assai, en ligason amé lo site regionau de Region Provença. Veirem ben se la còla actuala es lèsta de prendre la seguida d’aquela formula nòva.

Tot aquò per vos dire qu’avèm pesat dins la negociacion per faire aqueste prètzfach dins  una cèrca consensuala per cadun dei sòcis de Region Provença, tant de sei legeires coma dei legeires d’OCCITANIA-volèm viure al/au país. L’escomessa deurà èstre confiermada.

Gramacejar totei lei legeires e correspondents que dempuei vint-e-tres ans an aduch sa pèira au clapier, a l’Ostau occitanista de Provença. Per anar cotria e contuniar.

                                                                                                           LO CEBIER

 

 

F Lo Cebier, la letra occitanista de Provença que vous lisez  depuis les années 90, continue son travail d’information et vous en donne plus ! 

A compter du prochain numéro, le n°136, votre journal préféré, sera intégré en pages intérieures dans la revue Occitania. Vous êtes abonné au Cebier, pas d’inquiétude ! Vous recevrez Occitania et retrouverez, avec les mêmes contenus et la même volonté de l’actuelle équipe de rédaction de vous faire partager informations, analyses et propositions, votre « jornalet provençau».

Vous lirez, sur 8 pages, vos rubriques habituelles et vous aurez, en plus, accès à tous les articles de la revue Occitania. Un bandeau sur la couverture d’Occitania annoncera, à chaque numéro, la présence du Cebier, page X. Il ne vous restera plus qu’à vous ruer sur votre lecture favorite !

L’équipe du CEBIER

Pour réagir : info[a]adeo-oc.eu