Lo biais de viure de 40000 Bedoïns es amenaçat dins lo desert dau Neguev. Encara un còp tornem en Israèl. Encuei Emili Baujart de RFI nos mena dins lo desert dau Neguev. La premiera persona vista es THABET ABU RASS que ditz : « Imaginatz un pauc lo governament françès que demanda a sei paisans de laissar sei terras e d’anar s’istallar à Paris? Perseguís : « Avètz tres ans per lo faire, se lo fasètz pas, saretz desplaçats per fòrça! »
Thabet Abu Rass es un arabi israelian. Se bolega per faire cancelar una lei en discutida davant lo parlament israelian que vòu desplaçar 40000 Bedoïns dau sud dau pais devèrs lei vilas nòvas. Sariá adonc lo pus grand desplaçament de populacien en Israêl despuei leis annadas 50. Aquela lei sariá la mòrt dau biais de viure dei barrutlaires.
Dins lo desert i a doas categorias de Bedoïns : aquelei qu’an acceptat d’anar viure en vila dins leis annadas 70 e aquelei que son restats. Aquelei d’aquí son quasi 60000 e vivon de l’abaliment dei cabras e dau fedam. Un biais de viure aparat per Khalid Al-Amour que resta dins un vilatge amenaçat d’èstre prefondit. « Ma famiha resta aquí despuei mai de set generaciens, siam ben ente siam, e volèm restar aquí per aparar nòstrei valors. » Encuei trenta cinc vilatges bedoïns son agachats come illegaus per Israèl : per aquò an pus ges de servici public, ges de rotas, pas d’aiga, ges d’esclairatge, pas d’escòla, una vida en fòra, estent que lei Bedoïns son de cuitadans israelians. Thabet Abu Rass pensa que lo govern a dejà tirat son plan en refortissent l’identitat judieuva de l’Estat.
Encuei lei 200000 Bedoïns representan 30% de la populacien dau Neguev e tenon 5% dei tèrras. Lo projèct demeniriá l’espaci a mens de 2%. Doron Alenog coordòna lo projèct per lo premier ministre : « s’agís de tractar emè lei Bedoïns e de li donar de sòus ! » Mai l’ofèrta es limitada dins lo temps, un còp la lei votada. Bensai en 2014, lei Bedoïns auràn un an per acceptar ; a tèrme perdràn sei drets, en retorn lei terras saràn confiscadas.
