L’ivern se sarra e la question del calfatge animarà plan de discutidas dins las setmanas a venir. Se trapa que França es lo sol país al monde d’aver tan desvolopat lo calfatge electric (veser la comparason França 33% de calfatge electric, mentre qu’Alemanha es a 5%). Se pendent longtemps calfatge electric voliá dire convector, es mens vertadier dempuèi qualquas annadas. Mercés a la reglementacion novela « RT2012 » totas las construccions nòvas devon consomir pas mai de 50kwh per m². Del còp se son devolopadas las pompas a calor e la geotermia que fonccionan a l’electricitat mas d’un biais plan mai economic. Aquela evolucion recenta empacha pas que 8,2 millions de lotjaments dependon de l’electrecitat per se calfar (dos còps mai que fa vint ans). Vos presentam aici un grafic que montra lo consum d’electricitat en França sus una annada : clarament los meses ivernals veson una pujada de las belas !

E alara me diretz ? E ben justament i a quicòm que truca ! Sabiam ja que la tina del reactor EPR de Flamanville presentava de decas que porián far empacha a son utilisacion : concentracions tròp nautas en carbon dins lo beton que porián menar a una rompedura de la tina en cas de tust termic. Aqueste probleme es per ara estudiat per l’Autoritat de Seguretat Nuclearia (ASN), que  balharà lo seu diagnostic al mes de març.

Mas venem d’aprener qu’aquel probleme tocava en realitat 18 reactors actualament en servici !!  L’ASN a doncas demandat d’arrestar aqueles reactors per estudiar la causa e cercar de solucions. Es l’entrepresa Areva qu’es responsable d’aquelas decas e benleu tanben una entrepresa japonesa…

Una situacion calamitosa

Gaireben un terç del pargue nucleari francés es arrestat a la pòrta de l’ivern. Cossí alimentar totas las familhas que se calfan a l’electricitat ? Una penuria es realament possible se jamai las temperaturas baissan tròp.

D’autra part la societat Areva, autrescòps « fleuron » de l’industria francesa es en plena quicanela. L’arogancia dels decideires franceses los butèt a s’engajar sus de tecnologias tròp complexas e pas pro mestrejadas. En mai de documents qu’atestan de la qualitat de material fabricat al Creusot son estadas falsificats per amagar las decas : bonjorn la seguretat!

Las òbras entamenadas un pauc pertot son totas empetegadas dins de complicacions sens fin :

  • Finlanda : Areva es en conflicte ambe son « partenari » finés. La centrala venduda 3,5 milliards ne costarà fin finala 8 milliards !
  • França : l’EPR de Flamanville deviá fonccionar dempuèi 2012… mas es totjorn en construccion ! Còst de despart 3 milliards, mas en realitat ne sem ara a 10,5 milliards !
  • Inglaterra : a Inkley Point engajament d’EDF de bastir 2 reactors… malgrat las crentas dels sindicats e d’unes observators. Consequéncia : lo director financier d’EDF demissionèt ongan…

Un tal tableu deuriá menar a una seriosa remesa en causa de la gestion d’aquesta industria. Avetz ausit parlar de tot aquò ? Coneissetz de monde que pòdon perdre milliards sens la mendra sanccion ? Francament ieu ne coneissi pas! Per salvar sa filièra nucleara l’estat decidiguèt enfin qu’EDF crompariá l’activitat reactor d’Areva. E l’estat, de metre encara 5 milliards d’euròs suplementaris de sa pòcha … de la pòcha nòstra ! Seriá ora d’arrestar tot aquel degalhatge !

Jordil

Pour réagir : info[a]adeo-oc.eu