Inabituau, aqueste debat que se debanèt a La Sanha de mar a la debuta de setembre sur lei retiradas : ambé la senèstra dau Partit Socialista en la persona de Maria-Nadala Lienneman, Alan Lipietz, economista verd qu’aviam sostengut dins una pre-presidenciala fa quauqueis annadas a La Gàrdia, Totsants Codaccioni (MRC), Joèla Arnal (NPA),Pèire Costa (Partit Occitan). Inabituau, per de monde que pensan pas gaire lei memei causas sus l’autonomia de la Còrsa, lei lengas minorizadas de l’Estat francès. Mai sus lei retiradas, de convergéncias notablas.

 

Parlar d’avançadas, òc !

La M-N Lieneman, amé son franc Valentin, nos diguèt çò que pensava d’aquela reforma dei retiradas, una causa impossibla d’aparar coma es, en causa de l’alongament de la durada dau trabalh, çò confiermat per l’Alan Lipietz e l’ensems deis intervenents. E se tot lo monde de dire que quauqueis avançadas èran prepausadas (egalitat òme-frema dins lo travalh, penibilitat dau travalh, presa en compte dins lo carcul dei retiradas deis annadas d’aprendissatge e deis estudis longs),  faliá per mai d’un intervenent que l’alongament dei cotisacions e dau travalh dei seniors siguèsson sensa consequéncia dins lo recrutament dei joves, çò que semblava luench d’èstre asssegurat per la sala.

 

 E parlar pas de reculadas ?

E se parlaviam d’emplec per respondre a la question dei retiradas ? Verai, s’es dich mai d’un còp qu’ériam luench dau compte : luench de la cèrca d’emplecs regionalizats e d’un trabalh tant cooperatiu coma au País Basco Sud (P. Còsta); luench dau compte de la reduccion dau temps parciau per lei fremas que l’i trabalhan ansin dins sa majoritat ; luench encara d’un descompte de tres annadas per trenta de trabalh (Joèla Arnal ) ; luench, per la taxacion de la fugida fiscala (60 miliards, mentre que ne faudriá pas que 20 miliards per reglar lei retiradas per ara, segon  G.Tautil). E que dire d’aquela Euròpa que refusa dins sei tractats successius de tenir la question sociala e donc dei retiradas, question que cada Estat règla a son biais dins la rèire-cort  nacionala ? E la M-N Lieneman de respondre qu’èra a l’estudi au Parlament la question de la fugida fiscala. Mai quora vendrà ? Fau tanben ramentar lei declaracions inquietantas de J-M Ayrault sus lo complement de donar ais entrepresas que serián taussadas, e de precisar que son esfòrç seriá compensat per lei salariats (adonc tanben per lei retirats…) ; e de P. Moscovici, favorable a  la baissa dei cotisacions per elei ? O quand lo « ministre deis entrepresas », coma es nomenat dins la premsa,  rassegura lo Gattaz, patron dei patrons: « la reforma dei retiradas pesarà pas sus lo còst dau trabalh ». Totei neo-liberaus aquelei ministres socialistas ? Manca plus que lo Fabius,  ministre deis armadas, per subrequantar… Urosament, èra pas aquí. Es pas de creire ! Per clavar,  lo PCF dins la sala, de cotria amé lo Parti de Gauche, faguèt de proprosicions e convidèt lei participants a sei rescòntres, coma de costuma…

Un eveniment qu’es de tornar faire en Provença per mostrar que la reforma anonciada es  pauc o pron dins la rega dei reformas de 2006-2010. Posquessiam totei l’i tròbar d’idèas per caminar a nòstre biais dins nòstrei país provençaus e èstre presents dins lei manifestacions socialas !

                                                                                                         Gerard TAUTIL

Pour réagir : info[a]adeo-oc.eu