Dre que lo movament occitanista e lo movament mistralenc an fenit de si far guèrra dobèrta, metem vèrs la fin deis annadas quatre-vint, s’es pausat en Provènça la questien d’una federalisacien deis energiés faci a la societat e au poder politique. Après quauqueis òucasiens mancadas, dos evenaments an precipitat la convergènci. Promier, la gisclada d’un movament renegant l’unitat de la lenga d’òc, qu’un concors d’oportunitats politicianas a dotat d’una virulènci inesperada. Segond, la volontat de rèndre vesibla la coërènci de la revendicacien lingüistica qu’a menat a la coordinacien Anem, òc e ai grandei manifestaciens pèr la lenga que si son reproduchas jusc’a l’an passat.
Se leis abitualas charpinadas internas, poderosament ajudadas pèr lo tuèrt de personalitats volcanicas, an fenit pèr aguer la pèu d’Anem, òc, rèsta qu’en Provènça es a sa declineson locala, pus pacifica, que devèm la creacien dau Forum d’Oc. Longament preparada pèr dos ans de discrètei conferèncis a la cima, èra inaugurada pèr lo colòqui regionau tengut en Novèmbre darnier au palais dau Faròt de Marselha sus l’avenir de l’occitan en Provènça. L’interès militant qu’a provocat aquela manifestacien a mostrat coma respondié a n un desir e un besonh pèr sortir de la situacien estadissa monte leis embròlhs provençaus nos avien enfangats. Anonçat a la conclusien dau colòqui de Marselha, lo Forum d’Oc avié plus qu’a crèisse.
Seis autors, l’IEO, lo Felibrige, e leis associaciens cargadas de l’ensenhament (AELOC, APLR de Niça, Calandretas) an elaborat la Charta dau Forum (si pòu legir sus lo siti de Regien-Provènça-Partit Occitan : http ://occi.free.fr). Tota associacien, grope culturau o artistique, establiment escolari, administracien, coleitivitat locala, entrepressa, etc, (a l’esclusien dei partits politiques e gropaments confessionaus) pòu si declarar aderènt au Forum simplament en mandant un mail a contactforum@gmail.com. L’adesien es gratuita.
La promiera fasa dau Forum es justament la costitucien d’una basa la mai alargada possible. Totei lei militants son convidats a recomendar l’adesien pròchi leis istituciens que nen son membres o monte an de relaciens. Es evidènt que la fòrça dau Forum dependrà de l’amplor de sa representativitat. Lo recampament a naturalament pèr tòca de renforçar l’acien de cadun pèr une messa en comun dei ressorças sus de projèts coleitius a l’escala regionala, e tambèn pèr èstre una fòrça de proposicien pròchi lei decidaires regionaus e mai que mai leis elegits. A l’ora que la Regien va aguer un ròle de coordinacien major dins la promocien de la lenga regionala, lo sucès dau Forum es vitau tant pèr l’acien culturala que pèr l’acien politica, qu’en bòns occitanistas si refusarem totjorn de separar.
La promiera reünien dau Forum si tendrà en Òutòbre, e n’i aurà dos pèr an. Lei militants e simpatisants dau POC seràn tenguts au fiu ; d’aquì ‘quì, li faudrà si mobilisar pèr convincre lo mai possible d’istituciens de n’en faire partida.
Alan Barthélemy-Vigouroux
