Los deputats qu’an adoptat uei la lei sus la refondacion de l’escòla. En aquesta lei, peu prumèr còp desempuish 1951, quan estó votada la lei Deixonne, que trobam ua avançada en favor de las lengas ditas regionaus.
L’article 27 bis de la lei que reconeish l’ensenhament de las lengas regionaus e tanben l’ensenhament bilingüe. Qu’ei la legalizacion d’un sistèma qui ei estat desvolopat pauc a pauc desempuish un trentenat d’annadas per las escòlas associativas Calandreta e en seguida per l’Educacion Nacionau.
La reconeishença dens la lei de la possibilitat d’un ensenhament bilingüe que va perméter d’avançar mei rapidament dens lo desvolopament de l’auhèrta d’aquera fòrma d’ensenhament.
Lo partenariat qui s’ei hicat en plaça enter los rectorats, las regions e uns departaments a aqueth nivèu que’n sortirà ahortit.
Que’s cau felicitar deu tribalh hèit per senators e deputats de totas las regions pertocadas e de partits diferents entà har compréner au govèrn que calèva integrar aquera question en la lei.
Que cau saludar lo tribalh deus parlamentaris occitans ( deputats e senators) qui se son implicats en lo debat e qui l’an hèit víver.
Lo Partit Occitan que vòu tanben marcar lo ròtle important qu’a jogat lo deputat Paul Molac, deputat de Regions e Pòbles Solidaris, estacat au grop EELV.
Tot n’ei pas reglat de segur. Que demoran hòrt de causas a har entà aver ua vertadèra politica lingüistica publica en favor de las lengas ditas regionaus. Mes un tabó qu’ei cadut e un pas qu’ei estat hèit.
Monde associatiu, elegits locaus e parlamentaris qui’s senteishen pertocats qu’auràn enqüèra de’s mobilizar per d’autas iniciativas pertocant la preséncia de las lengas aus mèdias e en la vita publica.
David Grosclaude,
President del Partit Occitan
